المساعد الشخصي الرقمي

مشاهدة النسخة كاملة : هل يحق للزوج تفتيش جوال زوجته او العكس (موضوع للنقاش)


الناظر
06-21-2005, 01:50 AM
هل يحق للزوج تفتيش جوال زوجته او العكس(موضوع للنقاش)


السلام عليكم ورحمة الله تعالى وبركاته

أطرح بين أيديكم هذا الموضوع وأريد مشاركاتكم الهادفه


أحيانا يساور الرجل بعض الشكوك أو حتى الفضول للإطلاع على هاتف زوجته .

وسؤالي هنا ...


هل من حق الزوج التفتيش والإطلاع على أرقام زوجته ومكالماتها ووقتها !! !!!!!!!

وكذلك هل من حق الزوجه تفتيش والإطلاع على أرقام زوجها ومكالمته ؟؟؟


ترى !! ماذا سيفعل ؟!! هل سيسألها ؟!! أم هل سيراقب هاتفها ومكالماتها؟!!


فهل من حق الرجل تفتيش جوال زوجته والعكس؟؟؟ ........


بانتظار ردودكم الجميلة لنقاش هذا الموضوع



تقبلوا تحياتي
الناظر
.
.
.

عـطــر
06-21-2005, 02:37 AM
أهلا ناظرنا

خوش موضوع .. نتناقش فيه .. ليش لأ

اهي مو شغله حلوه موضوع التفتيش .. لا الزوج يفتش .. ولا الزوجه تفتش .. لأن هذا دليل على انعدام الثقه .. او انها قاعده تقل .. وهني نتنبأ بقرب وقوع كارثة ما؟

بس عاد انه يكون الموضوع عادي .. مو سالفة تفتيش .. فيكون الموضوع مباح للطرفين

يعني الزوج يطالع تلفون زوجته .. واهي نفس الشي .. على انه موضوع عادي
مممم يمكن .. ولو انه ماله اي داعي ولا اي هدف سامي

بس تفتيش .. وترصد .. ومراقبة .. مرفوضه من كلا الطرفين

الا اذا المسكينه حست انه زوجها .. يلعب بذيله .. يمكن تقوم تنبش من وراه :11

ومشكور

:22

...لقيمات...
06-21-2005, 04:10 AM
ممممم واللهِ آنا أقول إذا كان كل واحد فيهم واثق من نفسه فما راح ياخذ الموضوع بحساسية
بالعكس عادي راح يقول>>> كـــــــا إخذ/إخذي تليفوني لا وبعد إذا تبيني أراويك/أراويج إلي فيه ما عندي مانع وراح يعطي السالفة طــــــــــاف

لكــــــــــن المشكلة إذا تكررت السالفة أكثر من مرة وكل ساعة تنعاد نفس الحركة لا جذي يصير الموضوع فيه شك وغيرة وما أدري شنو >>>> وبالتالي آنا أنصح إذا لا إنشاءالله والله لا يقول وصار هالشي **يعني كل اشوي واحد من الأثنين أخذ التليفون وقام يتعبث فيه**
وصار زعل نحل المشكلة من الأساس >> إشلون

أنـــــا أقول لكم إشلون

إلي يكون زعلان يقول حق إلي مزعل ....

يبا هذا التليفون اخذه ما أبيه راح أستخدم تليفون البيت أو تليفون الدوام ... بس هــــا ترى إذا صارلي حادث بالطريج لا سمح الله ولا شي اشلون بتصل .... ممممم إنت المسؤول وهذا التليفون خله عندك تهنى فيه
بعد جم يوم جذي لما يتأكد إن لا والله غلطان وماله حق باللي سواه يمكن يرد التليفون لا ويعتذر بعد وما يعيدها >>> ويمكن يشتريلها / تشتريله تليفون يديد هدية :)

وبس وسلامتكم نأسف على طول الإجابة ...........

كويتي عسل
06-21-2005, 04:33 AM
الصراحه كل واحد الحين عنده اكثر من خط شغلة الخط الواحد صارت قديمه
يعني لو يكون الموضوع تفتش عن الخطوط اللي في مخباته يكون احسن ههههه

عـطــر
06-21-2005, 04:42 AM
لوول كويتي

ليش لأ .. جنه هالفكره حلوه ؟؟

مشكله والله .. وحتى الخطوط مو بسمه .. هم عادي

:5 هذي المدام المسكينه

يا غافلين .. لكم الله

:11

...لقيمات...
06-21-2005, 04:44 AM
وليــــــــــــه والله طلعتوا لنا سالفة يديدة بعد عشرين خط ؟؟......

شنقول باللــــــــــــه ...

البروفيسور
06-21-2005, 06:54 AM
والله انا اشوف ان مو منحق الزوج او الزوجه

انه او انها تطالع او يطالع تلفون الثاني

بس اذا صار في شك

مافيها شي اذا الواحد صارح الطرف الثاني بالشك

ويساله عن الموضوع الي شاك فيه

وسلامتكم

الناظر
06-21-2005, 03:04 PM
مشكوووووووووووووورين جميعا على الردود المقنعه

بس مثلا قاعدين على التلفزيون انت وزوجتك وفجأه رن تلفونها وشافت الرقم وماردت عليه

هل تسالها تقولها ليش مارديتي او تقولها منو اللي داق عليج ؟؟

love2teach
06-21-2005, 03:17 PM
http://www.geocities.com/emaaail/clgblinkie181.gif


ردي متاخره ... بس ما في مانع ادلي بدلوي ... :13:

و رايي مو مختلف عن اللي قريته من الشباب و الشابات

و طبعا من باب الفضول .. ما فيها شي اذا الزوج او الزوجه شافو تلفونات بعض و طالعو المسجات

يمكن واحد منهم مفرمت تلفونه و يبي يحط فيه شي بدال ما يضل فاضي :13:


بس اذا من باب الشك .... لا هني مأساه .. مالهم حق طبعا و لما يكون في شك بالموضوع ما راح يكون بس التلفون اهو الي يتفتش ..... الجيوب و البوك و و و و


بس لما يدق تلفون الزوج مثلا و ما يرد ... من الطبيعي ان الزوجه تسال و نفس الشي للزوج طبعا

ما فيها دام من باب الفضول و المعرفه .. اما اذا كان شك ... فالله يعين الطرف المشكوك فيه :10

شكرا ناظرنا على الموضوع

:22

...لقيمات...
06-21-2005, 04:02 PM
ممممم إذا دق وما ردت >>>> يمكن وحدة من رفيجاتها وما تبي تكلمها او العكس
طيب إذا ما صدق الطرف الأخر اشــــلون ....

عشان نحل هالمشكلة >>> أرد أدق عللي داق وكشت فيــه وأحطه سبيكر والكل يسمع الصوت
عشــــان مرة ثانية ما ينسئل هالسؤال وإذا قلت إن رفيجتي ولا قال رفيجي يعني حق المرة الياية أصدق أو يصدق ..........
>>>> ماشــــــاء اللــــــه لقيـــمات تحب تنهي الإشكـــــال على طول :) :)

بس لفتة إنتباه ترى العناء بالمرة مو شي وما يفيد وحتى لو ماكان في شي مع العناد راح يصير الشـــــــــــك @@

فليش الواحد يجلب المشـــــــاكـــــل حق نفسه ...

الاسير
06-21-2005, 04:13 PM
انا اقوول من حق الطرفين ان يشوف تلفوون الثاني 00

وانا برايي ان ما يشك فيك اله الي يحبك طبعا خوف الزوجه على زوجة انه لا يروح منيه ولا

منيه طبعا اتشووف تلفوونه بلحظه الشك 00 موو دوووام كل ما شافت تلفوونه على طوول

راحت أجيييك (( جذي انا اقوول شك اخبال )) 00

وبخصوص الزوج اي نعم من حقه الكبير انه يشووف تلفون زوجته 00 طبعا بلحظة الشك

مثلا دق التلفوون والاخت ما تبي اتشيل نعم اشك 00 ليش ما شالت 00 حتى لووو رقم غريب

ليش ما اتقوول لزوجه شووف رقم منوو هذا 00 لكن تعطي الموووضوع طاف جنه شي ما صار

جذي يرودني الشك 00

واظن غيرر جذي ما لهم حق انهم يشوووفون التلفونات 00

معلومه // الزوج لوو عنده سوالف ما يخلي زوجته اتشووف تفلووونه 00

ورد على الاخت لووف بخصوص ((((( طبعا من باب الفضول .. ما فيها شي اذا الزوج او الزوجه

شافو تلفونات بعض و طالعو المسجات 00 )))))

ما في شي اسمه فضوول والله ابي اشووف المسجات 00 يعني ما يصيرر الزوجة اتقول لزوجه

ما عندك مسجات نكت مثلا 00 والعكس صحح 00طبعا الزوجة ما تبي اله النكت 00


واشكرهم على الموووضوع الشيق 00

love2teach
06-21-2005, 09:05 PM
شدعوه يا الاسير .. يعني ما يصير امسك تلفون زوجي و اطالع مسجاته ؟ لازم اساله ؟

وبخصوص الزوج اي نعم من حقه الكبير انه يشووف تلفون زوجته


حق الزوجه اكبر عيل ..
وفي فرق كبير بين الحب و الشك .....اللي يحب ... لازم يثق.


كلامك يدل علي شي ........



انك مو متزوج :11

عـطــر
06-22-2005, 02:30 AM
يا الناظر

اهم شي الثقة بين الزوجين
والحركة اذا الزوجة سوتها .. يمكن ما تبي اترد على التلفون .. والزوج موجود .. لأنها تدري ان اختها مثلا حنانه وايد

واذا سألها الزوج .. وجاوبت .. بس كافي .. أما اذا ما جاوبت ف مالها حق .. وخل يشوف التلفون عادي

اما الزوجه .. فهي اللي لها الحق الأكبر بتنبيش تلفون الزوج
لانه طبع النساء جذي .. تخاف على ريلها .. وتخاف لا يلعب بذيله
فاذا كانت اللزوجه واثقه وايد من زوجها .. " والأفضل انها ما تثق وايد :11 "
ف خل ترييح بالها .. ولا ادور .. ولا شي

وبعدين يمكن مثل ما قال كويتي .. عنده خط ثاني ويلا ثالث ..

ليش عوار القلب؟؟ .. خليكم يالزوجات ما تدرون أحسن

:4

الناظر
06-23-2005, 12:23 AM
مشكووووووووورين على الردود والنقاش جميعا

انا برايي لو دق تلفون الزوجه وماتبي ترد على الاقل تبلغ زوجها تقول هذي فلانه مالي خلقها عشان تبعد الشك او الفضول بزوجها لانه الشيطان شاطر ،،
فاكبر مثال الرسول صلى الله عليه وسلم كان يمشي مع احد زوجاته بالظلام وبالطريق مر عليه رجل فالرسول ناداه وقاله هذي زوجتي فلانه حتى يبعد الشك عنه ويقطع عنه شر الشيطان عشان اذا راح البيت مايلعب بعلقه الشيطان ويقول الرسول كان مع امرأه غريبه ،، فالرسول من حكمته وحنكته قطع الشك وناداه وقاله هذي زوجتي

فمن رأيي الشخصي الافضل انها تقول حق زوجها هذي فلانه او هذا اخوي اتصل يبي مني شغله ومالي خلق ارد عليه حتى تطمن زوجها ومايساوره الشك

وفي مجتمعنا اعتقد الزوجه اذا شافت انه زوجها مايغار عليها تقول هذا مايحبني

والمجال مفتوح للردود والنقاش للجميع

الاسير
06-23-2005, 12:30 AM
اشكرك مرة ثانية يا ناظرنا على الموووضوع 00

وانا ايد كلامك //

وفي مجتمعنا اعتقد الزوجه اذا شافت انه زوجها مايغار عليها تقول هذا مايحبني 00


والله ان كلامك ميه ميه 00



مع خالص التحية ,,

...لقيمات...
06-23-2005, 09:10 PM
مممممم صحيح يالناظر
واللـــــهم صــــــلي على ومحــــــمد وآل محمــــــد فعلا الرسول صلى الله عليه وآله وســـلم قدوة للجميع ..................

شــــــكرا لك عالموضوع الشيق .......

وفي مجتمعنا اعتقد الزوجه اذا شافت انه زوجها مايغار عليها تقول هذا مايحبني >>> بس عـــاد لا تصير الغيرة بخبـــــــــــــــــال :)

عـطــر
06-24-2005, 01:00 AM
ممممممممممم

ما أعتقد ان كل الحرسم .. يقولون .. انت ما تغار علي .. انت ما تحبني

لأني ما أحب غيرة الريال .. تغثني
واثبا الحب .. يبين بأشياء ثانية .. مو أشياء تعل قلبي؟؟

لا مشكور .. لا تغار علي .. ولا تعور راسي

تحبني .. ابي اشوف بعيني .. اشترلي .. ودني .. حط لي .. مو غار علي .. واذني بحنتك

لوول

ويلا اشرايكم؟؟

:13:

love2teach
06-24-2005, 03:00 AM
اتفق معاج عطوره قلبا و قالبا ...
كلامج 100% صح ..
" الحرسم "
هذي عجييبه ... ضحكت عليها من صج و بصوت بعد .. ههههههههههههه

عـطــر
06-24-2005, 03:09 AM
لووووووووووووول

شسوي الحماس خذاني

وانا اصلا تخصصي بالجامعه " بدليات " :p

صج أنا بسوي دراسة .. بهالموضوع :11



بس مشكوره على المؤازه .. وتأييد كلامي


:4

meme_aljaber
06-24-2005, 03:26 AM
مساء الخير ........

لفت نظري موضوعكم واحب ارد واقول ليش الزوج او الزوجة يوصل للمواصيل انه يتعبث بالجهاز الا انه شايف شيء ؟؟؟؟؟
يبي يقطع الشك باليقين عيل خلاص سيبووووووووه يتعبث وينبش ويدور علي عسى يرتاح
وينام الليل .
الشك يولد الحسرة والحسرة تخلي الواحد ماينام واللي ماينام عمره مايكون صاحي ولا اشرايكم
وبس
مشكورين .
:22

صمونه
06-24-2005, 03:29 AM
مرحبا جميعا ....

ما شاء الله عليكم كفيتوا ووفيتوا بالموضوع و هو شيق بصراحه

بس الموضوع بصوب و (الحرسم ) بدليه عطوره بصوب ثاني:fighting2

بسج بدليات يا عطر:fighting6


المهم انا ما راح اكرر بالكلام لانكم ناقشتوا كل الافكار ....

و انا اايد كلام عطر ان الزوجه اهي اللي لها الحق الاكبر في تفتيش تلفون زوجها بس ما

في مانع ان الزوج يطالع تلفون زوجته من باب الاطلاع و ليس من باب الشك



ملاحظه انا قلت اني اايد كلام عطوره لكن من دون البدليات:11

love2teach
06-24-2005, 03:38 AM
اهلا meme
شكرا على التسجيل و الانضمام لنا
نورتينا :)


اعتراضنا ان الثقه لازم تكون موجوده فما يحتاج انه يفتش

بس اذا بيدوخ راسه و يصير مو صاحي ... لا يبه خل يفتش لي باجر
و لكن اعتقد يضل شي مؤسف و يحز بخاطر الزوجه او الزوج
خاصة لما يتكرر التفتيش و ما يلقى شي ...
هذا معناه انه يغار او يشك بشكل مو طبيعي
و مصيبه اذا الواحد اضطر يعيش مع شخص شكاك

تحياتي

sulafa
06-24-2005, 03:55 PM
انا مع لقيمات صراحه انتو كفيتو ووفيتو ومعاها بنفس كلامهم من حق الزوجه اكثر انها اطالع بتلفون زوجها .. تدرون الرياييل ينخاف منهم وطبعا هم مافي مانع ان الزوج يطلع تلفون زوجته .. والله هم الحريم ينخاف منهم لؤؤؤؤؤؤل

وبعدين الواحد اهو يخلي الشك ايي حق الثاني اذا كان تلفونه دايمن بيده او يسولف فيه واذا دش الزوج او الزوجه اتسكر بسرعه او ينام ويخلي التلفون يم راسه اي ليش هالحركات

مادري وايد حجي كان براسي بس طار الحين :)

صمونه
06-24-2005, 08:28 PM
اهلين سللوفه ..... انتي على هالتوقيع اللي حاطته اكيد تقولين ان في حريم ورياييل ما لهم امان

احنا نقول ان اثنينهم لهم الحق يطالعون تلفونات بعض .... لكن مو باب الشك و الغيره

عـطــر
06-25-2005, 05:25 AM
التلفون مثل منتوا شايفين صار ضرورة

مو ترف

وانا اشوف .. انه الريال اللي اذا دش البيت .. طفى جهازه .. هذا الي ينخاف منه

ويلا ليش مطفيه؟؟ .. ليش خايف من منو انه يدق عليك .. وتتوهق ام العيال؟

ههههههههههه .. مو وجهة نظر .. تكفون؟

بس هم أرد أكد على النقطه اللي قالها كويتي

خافي يا المره " مو الحرسم " :11
من انه يكون عنده خط ثاني ويلا ثالث .. وانتي ما تعرفينه

لوول

والأفضل

لحد يدور ورا أحد

ودعوا المخلوق للخالق

:4

al_z3eem
06-25-2005, 10:18 AM
انا حبيت ارد على عطر بس اشلووون اهد ((المخلووووق للخالق))

اذ قلنا ان المره هدة المخلوووق للخالق

ولا ثالث يووووم داش البيت معاه الزووووجة الاثانيه((((شريجتها)))

بشنو تفيده هد المخلوووق للخالق .................................

وانا الصراحة من مؤيدين التفتيش وراه المرء و وراه الرجل

اخوووكم//

meme_aljaber
06-25-2005, 07:06 PM
طبعا مصاخة ان كان شك على الفاضي بعد ومسخرة وقلة أدب بعد لالالالالالالا وماينسكت عنه
بس انا اقول يا جماعة الخير ان عرف السبب بطل العجب
يعني الانسان يساوره الشك في بعض الاحيان ولا بأس من التحقق فيه .
لكن شنو نقول في ناس فيهم مرض الله يكافينا الشر شنو نسوي لهم مانقول الا الله يشافيهم وانا هم أضم صوتي لصوت عطر : صج لما يدش البيت ليش يسكر الخط ؟؟؟؟؟؟ هااااااااااااا
اشعنده ؟ اشماعنده ؟ خله مفتوح ساعة ساعتين بعدين طفه ولا خله على الشاحن ...... عموما دايما أقول اللي على راسه بطحه يحسسها
ولا اشرايكم يالربع
:10

love2teach
06-25-2005, 08:29 PM
عدل كلامج ميمي

الريال او المره اهم اللي ايبون الشبهه لانفسهم ...

بس اهم شي ان الشك و الغيره ما توصل لمراحل مرضيه

ساعتها يصير التعامل معاها صعب جدا

تحياتي
:)

ابو محمد
09-08-2007, 01:00 AM
كل الشكر للاخ الناظر على طرحه لهذا الموضوع وان كان موضوع شديد الحساسية ولكنى اجيبك بما اتفق به مع رأى الشخصى ( وهذا رأى الشخصى )


اولا: نتفق على مبدا
مراقبة الزوج لزوجتة فى كافة شؤنها (و منها الموبيل) واجب عليه لانه راع و مسئول عن رعيته امام الله ... اما مراقبة الزوجة لزوجها فليس له اصل الا اذا كان بزوجها علة ( اى عدم الحرص فى مال بيته او رفقاء السوء او شرب المحرمات او خليلات الحرام) و خافت على بيتها ان يهدم من اى سبب فيحق لها مراقبة زوجها لدفع الضرر.


امثلة: أولا : الاب راع و مسئول عن مراقبة اولاده و توجيهم و المدير راع و مسئول عن مراقبة موظفيه.... و قائد الجيش راع و مسئول عن مراقبة جنده و جميع المؤسسات الناجحة تقوم على اساس الثقة و الاحترام فى العمل ثم المراقبة و المكافأة و العقاب. فما بالك بأسمى علاقة الا و هى الزوج


ثانيا: بالنسبة لموبيل الزوجة
تنقسم مكالماتها و رسائلها الى شقين

اولا: شق الاهل و الاصحاب


و ثانيا: شق العمل

اذا كانت من الاهل و الصويحبات المعروفين فهذا لا يوجد فيه خلاف الا صويحبات السوء فاللزوج دفعهن .





اذا كانت من اقرباء العائلة فهذا يرجع للزوج بالسماح لهذا او لذاك و عند عدم السماح لشخص وجب الطاعة و لنا فى زوجة ال***ر عبرة.
اذا كانت من العمل من النساء فهذا لا يوجد فيه خلاف الا صويحبات السوء و وجب عليها الطاعة
اذا كان من العمل من الرجال فهذا مرفوض شكلا و موضوعا .
ماذا تفعل ايها الزوج...

1- اولا يجب ان تعمق دائما شعور المراقبة بأنه ليس شكا او طعنا بالخيانة و انما هو فى نطاق الحماية و الامان للزوجة و فى نطاق الغيرة الحميدة ( لعن الله الديوث) و ان تكون المراقبة فى حدود المعقول فلا هى حصار و حصن حصين ولا هي عمارة من غير بواب.









2- مكافأة الزوجة بأى رحلة او ملابس او نقود او اى شىء اسوة بزميلاتها و ان تلبى رغباتها التى لا تستطيع ان تبوح لك بها و ان تغير من صفاتك التى تكرهها و ان تأخذ الجانب الايجابى فى معرفتك خصوصياتها لتقترب منها.

3- عند عدم تقبلك لاى شخص يجب ان يكون هذا فى اطار الموضوعيه و شرح الاسباب و على الزوجة ان تلتزم و اكررها تلتزم برغبة الزوج فى اى من حالات الرجال سواء العمل او الاقارب و ان تحاول تلبية رغبة زوجها بالنسبة للنساء.




4- ان تتق الله فى زوجتك و اهلك فلا بارك الله فى راع ضيع رعيته.









ملحوظة:

يفضل للطرف المتهور و ذوى ردود افعال عنيفة بالبعد عن المراقبة
هذا لا ينطبق على الشخصيات المريضة رجالا كانوا او نساء.

والزوجه ايضا راقبي جوال زوجك لكن بذكاء، اطلبي منه الجوال لاجراء مكالمه مثلا

او اطلبي منه قراءه مسجات جميله تريدين ارسالها لجوالك، بذكاء تستطيعين وهذا من حقك

لكن اذا جاءت الزوجه بانفعال وطلبت ان تشاهد مايوجد داخل الجوال فان الرجل سوف يرفض
لانه لايحب ان تعبث المراه باسراره يحب دوما ان يبقى شيء من خصوصياته غامضه عن
زوجته حتى اذا لم يخطا.


نصيحة اخيرة:
شاركى ايتها الزوجة و شارك ايها الزوج الطرف الاخر فى رسائلك الطريفة او اختلقا اى موضوع عن جوالكما حتى تعطى الطرف الاخر فرصة مشاهدة جوال الاخر (المراقبة المسموحة) و هذا سوف ينمى سلوك الثقة بينكما .
يعطيكم العافيه

عـطــر
09-08-2007, 02:23 AM
مشكور اخوي بو محمد على الكلام الرائع ...

والنصائح الجميلة ..

وبارك الله فيك ..

donia_2
09-27-2007, 10:18 PM
ألسلام عليكم


ما شاالله عليكم ما خليتوا شي ما حكيتو فيه

مشكور يا أستاذنا الكريم الناظر على طرح هذا الموضوع الشيق

والله أنا عندي وجهة نظر

انه مسموح لكلاهما مراقبة الآخر مو بمعنى المراقبة بس متل ما قال الأخ محمد انو لازم يكون في ثقة وبعدين انا مو شايفة انو في هالخصوصيات اللي بالموبايل اللي تستدعي حدوث كل هذي المشاكل هو راح نراقب وين ولا وين

ما متل ما حكيتوا ما صار الواحد عنده خط ولا خطين

انا من رأيي اهم شيئ الثقة بين الطرفين
لو موجوده انشالله ما في مشاكل


مشكورين جميعا و يعطيكم الف عافية

أحمد الحنفي
09-27-2007, 11:37 PM
السلام عليكم ورحمة الله وبركاته
هذا الموضوع جد خطير إن كان سلوك الزوج هكذا فهو إنسان مشتت الذهن
وذو مبدأ خاطئ طبعاَ ويا أخي هذا هو إختيارك فعليك الثقه في إختيارك
فأنت من أختار وناسب وهذه ام ابنائك كيف تفعل هذا الفعل
في النهايه انت مخطئ جداَ,,,,,,,,,,
وحياكم الله

مدرسه عليميه
09-29-2007, 09:29 PM
اسمح لي ردي السريع والقليل

الرجل مايفتش بتلفون زوجته إلا إذا هو قام يلعب بذيله فتساوره الشكوكـ وحسباله كل الناس مثله ... يعني بإختصار شديد

"" كلن يرى الناس بعين طبعه """

ابتسامه :)
09-30-2007, 02:55 AM
السلام عليكم ورحمة الله وبركاته

الرياجيل الحين مفتحين باللبن اذا عنده خرابيط بيكون عنده خطين وأكثر وماراح ينزلهم للبيت بيخليهم بالسياره وينزل للبيت التليفون اللي تعرفه زوجته وأهله وربعه الخاصين يعني الرجال دارسها عدل
واللي تبي خراب بيتها تفتش تليفون زوجها لأن 90% من رياجيل الكويت يكلمون بنات
أعرف بنات طاحوا على رياجيلهم يكلمون بنات وعقب كان ردهم كيفي واذا مو عاجبج روحي بيت أهلج علشان ياخذ راحته
أما الزوج من حقه يراقب تليفون زوجته مو من باب الشك لكن من خوفه عليها لكن لايبين لها أنه يفتش يقول لها أبي مسجات حلوه أو يلعب قيم بتليفونها ويفتش على راحته
وشكرا لك عالموضوع

كاره المدرسة
10-03-2007, 03:45 PM
أنا من وجهة نظري
الزوج والزوجة لازم يكون لهم ثقة لبعض
وإن كان لازم تفتيش
كل واحد يفتش جوال الثاني في نفس اللحظة وأنا أقول
فكرة التفتيش مالها داعي علشان راح تسبب الهواش زي مقال أحد الأعضاء
وضعف الثقة

اصيله
10-04-2007, 04:01 PM
ما اقول الا كلمه وحده :

حلاله ... التلفون واللي فيه ..

بما ان الزوجه واثقه من نفسها هذا راح يكسر عينه اذا كان شكاك

واذا كانت عنده سوالف وينظر لها بعين طبعه .... خل يفتش لين ياخذ درس بالوفاء والاخلاص

يمكن يحس على دمه ويبطل ............ خرابيط