كل مايتعلق بخبرة بلدي الكويت...أرجو التثبيت

[عذوب-77]

مدرسات اشرايكم يكون هالموضوع مكان لجميع أفكارنا لخبرة بلدي الكويت؟ من بداية النشاط الصباحي والعمل الجماعي لغاية فترة الأركان واللاصفي. وأبيكم تمخمخون من الحين للخبرة نبي نستقبلها بكل همه ونشاط ونتبادل أفكارنا وخبراتنا عشان الكل يستفيد..لا أخفي عليكم الخبرة علي ومن الحين مشتطه وشاده حيلي. ببدأ على بركة الله.. ونعم بالله أول يوم بنقدم قصة على المسرح عن كويت الماضي وتاريخنا طبعا الديكورات بيوت مسوينها من كراتين كبيرة وراسمين عليها بيوت كخلفيات وبنحط عندنا راسمين على خامه كبيرة منظر بحر ومراكب شراعيه وبنعلقها على جنب يم البيوت والشخصيات بيلبسون ملابس شعبيه قديمه الوزار والبخنق والدراعه وتدخل بنت على جدتها وتسألها عن حياتهم قبل اشلون كانت..فالجدة تحكي لها وطبعا وهي تحكي لها تمر على البيوت وتوصفها لحفيدتها وبعدها تمر على البحر والبحارة الموجودين(طبعا اطفال لابسين وزار ومعاهم شبك وفيه سمك) وتتكلم الجده عن المهن القديمه....الخ. وانشاء الله باجر بكمل لكم بالتفصيل عن الدروس والمنبهات اللي عندي والألعاب اللي تتخلل الدروس..(لانها عندي بالفصل وباجر باخذها عشان أنقل لكم أفكاري اهنيه )لاني لو مااكتب أفكاري أنساها..تدرون مدرسات الروضه تفكيرهم علطول مشغول بكل شي الله يعيننا. الله الله بأفكاركم النيرة ومو شرط الفكرة تكون جديده ممكن تكونون مطبقينها السنه اللي طافت بس تكون عندي انا جديده أنتظر مشاركاتكم بفارغ الصبر

[&كيفي أبله&]

خوووش موضوع عذوب يعطيج العافيه انا مفكره القصه اللي بنعرضها ان نسويها على مسرحيه عايله (اب-ام - اولادهم) يتناقشون ان بيسافرون بس الاب يقترح عليهم الاماكن السياحيه الحلوه الموجوده بالكويت وكل ماقال الاب معلم من معالم الكويت ندخل هالمنظر على المسرح النشاط المبتكر .. ودي اسوي فقرة المطبخ ويسون علم الكويت بالخضار بقعد امخمخ لها عدل باقي الشعبي والرياضي بفكر فيهم

[عذوب-77]

كيفي أبله فكرة الأسرة ومعالم الكويت وايد عجبتني انشاءالله بطبقها..وفكرة المطبخ بعد حلوة بس اشلون على المسرح بتسوينها؟ والفصول شنو يسوون؟والا تقصدين ان كل فصل يسوي علم الكويت من الخضار؟ وشكرا على تواصلج ومرورج الكريم يسلموووووووووو

[&كيفي أبله&]

اي قصدي ان كل فصل يسوي بروحه .. احنا بس نوزع عليهم الخضار والباجي عليهم

[عـطــر]

الله يعينا المدرسات ... مخنا واعليه يتعب من كثر التمخمخ والله ما هقيت عندي أفكار الحين ,,, بس عاد خل اقولكم بخبرة الماء والهواء سوينا كندري حطيناه طول الاسبوع الاول وبداية الثاني ثابت عالميسرح من ضمن الديكورات.. يبنا علاقة ملابس وثبتناها من تحت بطابوقتين هههههه ولبسناها دشداشتي ومن الكموم دخلنا عصاية الكندري اللي معلق فيها " قواطي " حليب التموين المغلف بالقصدير ووحده من البنات عندها علبه عليها من الخام وجه ولد .. حطيناها بالويه ولبسناه الشماغ .. صج شكله كان فزاعه لووووول .. بس حلوو طلع وفنتق لانه ثابت طول الاسبوع الأول لين يوم احتجنا منه العصايات الكندري .. فشلناه بنص الاسبوع الثاني. الرياضي .. حطوا يوم مباراة بين الكويت .. والسعودية مثلا .. كل مره نسويها الفصول يقعدون بشكل مستطيل ومدرستين ومرمايين وفريقين .. ومدرسة حكم ... وحطوا اغاني للمنتخب .. وخلوها مباراة صجيه على الارض مو عالمسرح .. ايام الاسبوع ... حطوا باسبوع على مباخر مثلا او اثواب هاشمية يلبسونهم بنات مثبتين ايام الاسبوع .. او الزبيل " السله " لتشجيع المدرسات والاطفال .. حطينا جوائز لكل فصل يغني بصوت عالي وحلو .. وكانت الهدايا عباره عن جيس كامل بفك .. تطلعون شخصية ثابته شعبي مثلا او مجسم ابراج او اي شي يدل عالخبره هو يعطي الهديه للصف مع تشجيعه ...واختيار الفصل يتم عن طريق المشرفات مثلا ... والافضل انكم ما تكررون الفصول حتى ما يغسلون ايدينهم اللي مو حرجيين لووول ... يعني حاولوا بنهاية الخبره الكل يكون تكرم بس تعبت وانا اطلع ... ارجع لكم بافكار ثانيه ان شاء الله .. تم الثبيت حتى الانتهاء من الخبره ... وكل عام والكويت بالف خير يا رب العالمين..ش

[love2teach]

ماشاء الله عليكم بنات .. افكار حلوه ومجهود طيب عساكم عالقوه حبايبي و موفقين يا رب ملاحظه: الحمدلله اني مو معلمة رياض اطفال ... شغلكم متعب ..خلونا على ABC اهون

[&كيفي أبله&]

مشكوره عالاقكار عطوره كلش عاد ولا الفزاعه التنكره بلبس الكندري لووووول .. بس انا ملاحظه ان اغلب الرياض يزينون مسرح النشاط بديكورات على حسب الخبره الا احنا <<< فكه خخخخ لوف .. اي والله خلج على الانجلش واااايد اريحلج بال بالنسبه حق ايام الاسبوع .. بنلبس الاطفال وشاح وقبعه على علم الكويت واليوم الشعبي والرياضي بنطلع الاطفال اللي لابسين لبس اليوم طبعا وفكرت بالمباراة بس هونت لأن منو الابله اللي بتعلق انشاءالله .. ؟؟ لا يكون انا !!!!! مابي كلشي انا انا انا انا انا نوووووووووووو مستحيييييييييييييييييل

[العُلا]

السلام عليكم يازميلات المهنه الشاقه ماشاء الله عليكم افكاركم رووووعه وان شاء الله لي عوده مع افكاري

[love2teach]

يا هلا كويت ماجيك .. حياج الله بانتظار مساهماتج حبوبه .. الله يعينكم على مهنتكم اختج ام يعقوب

[عذوب-77]

ياهلا فيكم حبيباتي وزميلات المهنة الشاقة بس أحب مهنتي P : المهم أدش عالموضوع مباشره عشان ماأطول عليكم السبت : بنسوي مسرحيه :بنحط هدى حسين اللي فيه تعلن شركة الخطوط الكويتيه عن اقلاع رحلة رقم كذا المتوجهه إلى السعوديه(بهالوقت نحط أغنية سعوديه وطنيه وتدخل عليها طفله لابسه الزي السعودي وتوقف بالمسرح وبعدها ترد تشغل شريط هدى حسين لا تقول المتوجهه الى دولة الامارات العربية وتدخل طفله لابسه الزي الاماراتي ونكرر كذا زي وبالاخير الزي الكويتي ونحط اغنيه وطنيه ونرفع الاعلام من خلال المسرحيه هذي يتعرفون على دولة الكويت وزيها وزي دول الخليج المجاوره للكويت وهو تمهيد لبدايه الخبرة والشعبي احتمال نسوي تمثيليه من أطفال ومعلمات النشاط ومن ضمنهم أنا (معلمات الرياض ممثلات ومغنيات ومدرسات رياضة وعربي ودين وكل شي خخخ) المهم عن تراث الكويت القديم وألعابها الحجله والدامه والدرباحه و....الخ وبنحط قعده أرضيه سدو ومساند أرضيه ويمها حلويات قديمه كويتيه...وعقبها كل فصل يلعب لعبه شعبيه مع معلمته. أما اليوم المبتكر: بندخل اربع بنات لابسين دراريع أحمر أخضر أبيض أسود على الوان علمنا وكل وحده من الاطفال يكون على صدرها معلق صوره مختلفه(أبراج الكويت-برج التحرير-البوم الكويتي-المسجد الكبير) ويدخلون على اغنيه زفه عروس وتكون اللي لابسه الابيض اول وحده فيهم والثلاث وراها ومعاهم دفوف ويوقفون عالمسرح فوق ونحط اغنيه عبدالله الرويشد اللي فيها الابيض قلوب أهاليها والاخضر في اراضيها أكيد تعرفونها بس انا ناسيه شنو اسم الاغنيه بالضبط. المهم تخلص الاغنيه وهي مو طويله بعدها تسال المعلمه كل وحده من الاربعه اسمها ومكان تواجدها ( يعني معالم الكويت يعرفون عن نفسهم للاطفال ويوصونهم بالمحافظه على نظافة الكويت ومعالمها) وبعدها كل فصل يرسم لنا لوحه حميله تعبر عن معالم الكويت وبالاخير نختار اجمل لوحه ونكرم الفصل الفائز بهديه. أما اليوم الرياضي بيكون مباراة بين الفريق الكويتي والفريق السعودي (فكره الاخت عطر) ودمتم سالمين